वासिङ्टन, २३ पुस : हालैमात्र प्रकाशन गरिएको अमेरिकी राष्ट्रपति डोनल्ड ट्रम्पको विषयमा आधारित एक पुस्तकलाई उहाँले काल्पनिक पुस्तक भन्नुभएको छ । सो पुस्तकमा अस्थिर मानिस र राष्ट्रपति पद सम्हाल्नका लागि असक्षम व्यक्ति भनेर टिप्पणी गरिएको छ । उहाँले आफू राष्ट्रपति पद सम्हाल्न सक्षम रहेको भन्दै यस्ता पुस्तकहरुले लेख्दैमा मेरो चरित्रमा कुनै फरक नपर्ने र असक्षम भनी यस्ता काल्पनिक कथाहरुले लेख्दैमा नहुने प्रतिक्रिया पनि दिनुभएको छ ।
माइकल वूल्फद्वारा लिखित सो पुस्तक राष्ट्रपति पदका लागि ट्रम्प योग्य व्यक्ति नरहेको आरोप लगाइएको छ । प्रायः विवादमा आइरहने अमेरिकी राष्ट्रति डोनाल्ड ट्रम्पको विषयमा यो अर्काे विवाद सुरु भएको छ । साथै उहाँले पुस्तक लेखकलाई धोकेबाजको संज्ञा दिएकोले पनि आगामी केही समय राष्ट्रपति ट्रम्प र पुस्तकका लेखकबीच विवादहरु उत्पन्न हुनसक्ने अनुमान गरिएको छ ।
उहाँले आफ्नो निर्वाचनका समयमा रूससँग निर्वाचनका विषयमा सम्बन्ध भएको भन्ने आरोप पनि काल्पनिक भएको बताउनुभएको छ । उहाँले आफ्ना कैयौँ ट्विटर सन्देशहरूमा आफू एकजना सक्षम र स्थिर व्यक्ति भएको पनि बताउनुभएको छ ।
सो पुस्तकमा राष्ट्रपति ट्रम्पलाई केटौले पाराको व्यक्ति भनी चित्रण गरिएकोले अमेरिकाका विभिन्न सञ्चारमाध्यमले सो विषयलाई निकै प्रचार गरेका छन् । त्यसैले पनि राष्ट्रपति ट्रम्पले आफू अमेरिकाको राष्ट्रपति पदका लागि एकदमै सक्षम व्यक्ति भएकोले नै अमेरिकी नागरिकले आफूलाई चयन गरेको बारम्बारको आफ्नो ट्विटरमार्फत बताउनुभएको छ ।
