काठमाडौं, २८ पुस
एक फरक फिल्म ‘हेट स्टोरी’बाट बलिउडमा डेब्यु गरेकी बंगाली नायिका पाओली दमले आफ्नो पहिलो फिल्ममा दिएको एउटा बोल्ड सिनले गर्दा उनी रातारात चर्चामा आइन् । जति नै उत्तेजक सिन दिएता पनि बलिउड अभिनेत्रीको रुपमा उनको करिअरले सोचे जस्तो गति लिन भने सकेन ।
गत डिसेम्बर ४ मा गुवाहाटीका रेष्टुरेन्ट मालिक अर्जुन देवसँग पाओलीले विवाह गरेर फिल्मलाई ‘गुडबाई’ गरेकी थिइन् । हनिमुनका क्रममा स्विजरल्यान्ड पुगेको जोडी त्यहाँ फसेपछि फेरि चर्चाको केन्द्रमा आएको छ । उनको विवाहमा उनको परिवारका सदस्य, केही आफन्त र साथीको मात्र सहभागिता थियो ।
विवाहपछि यो जोडी हनिमुन मनाउन स्विट्जरल्यान्डको हिउँ ढाकिएको इलाकामा पुगेको थियो । रोमान्सका लागि उपयुक्त थलो मानिएको यो ठाउँ पाओली जोडीका लागि भने पीडादायी बन्यो । हनिमुन मनाउन गएको यो जोडी भीषण हिमवर्षाको चपेटामा परेपछि मुस्किलले ज्यान बचाएर फर्किएको छ । भारतीय सञ्चारमाध्यमले अत्यधिक हिमपातका कारण सो क्षेत्र संकटग्रस्त बनेपछि सरकारले सो क्षेत्र खाली गराएको बताएका छन् ।
समाचारमा उल्लेख भए अनुसार पाओली श्रीमानका साथ त्यहाँको स्की रिसोर्टमा बसेकी उनको हिमपातका कारण सञ्चार सम्पर्कसमेत टुटेको थियो । हिउँ पर्ने क्रम नरोकिएपछि रेल्वे ट्रयाकको बाटो पनि पूर्ण रूपमा बन्द भएपछि सरकारले सो ठाउँमा बसेका सबैको उद्धार गरेको थियो । चिसोकै कारण बिरामी भएकी पाओलीलाई त्यहाँको सरकारले हेलिकप्टरबाट उद्धार गरेको जनाएको छ ।
पाओली र उनका पतिसँगै त्यहाँ फसेका पर्यटकलाई पनि सुरक्षित स्थानमा लगिएको थियो । पाओलीले ‘अंकुर आरोरा मर्डर केस’, ‘यारा सिलीसिली’आदि फिल्ममा अभिनय गरेकी छिन् । पाओलीको डेब्यु रहेको ‘हेट स्टोरी’ बलिउड कै एक हिट फिल्म मानिन्छ ।
