नवलपरासी, २३ माघ
हिन्दू र मुसलमान समुदायको संयुक्त धार्मिक आस्थाको केन्द्र मदारबाबा मेला शुरु भएको छ ।
मराजको मुख्य समाधिस्थल (पूजास्थल ) मा मुख्य पीठाधीश अमिरुल्ला अन्सारी सोमबार नै पुगेपछि मेला शुरु भएको हो । मदारबाबाको मेला लाग्ने स्थल नवलपरासी (बर्दघाट सुस्ता पश्चिम), सुस्ता गाउँपालिका-२ महलबारीबाट ९ किमी पहाडी क्षेत्रमा पर्छ ।
मदारबाबाको मराजमा पुग्नका लागि लामो समय र अप्ठ्यारो बाटो तय गर्नुपर्ने हुन्छ । महलबारी गाउँबाट निकै कठिनाइपूर्वक ९ किमी पहाडीयात्रा गरेर बाबाको समाधिस्थल जानुपर्छ । मेलामा नेपालका साथै भारतका दिल्ली, मुम्बई, बिहार, बंगाललगायत विभिन्न स्थानबाट १० लाखभन्दा बढी भक्तजन आउने अनुमान गरिएको छ ।
मेला ३५/३६ वर्षयता निरन्तर लाग्दै आएको छ । यस वर्षको मेला आगामी फागुन १ गतेसम्म चल्ने छ । मेलामा आउने भक्तजनको सुविधा र व्यवस्थापनका लागि स्थानीय कुतबुल मदारशाह दरगाह समितिले काम गरेको समितिका सचिव अजमुद्दिन मियांले बताए ।
मेला मुसलमान मान्यतानुसार महान्ऋषि बदिउद्दिन शाहको ६०१औं वार्षिकीका रूपमा मनाइँदै छ । विकट पहाडमा पूजापाठ गर्न आउने भक्तजनले भाकल गरेको पुग्ने विश्वास छ । सन्तान नहुने दम्पतीले सन्तान पाउने,दीर्घरोगी निको हुनेलगायत मान्यता र विश्वास भएकै कारण मेलामा आउने भक्तजनको संख्या दिनानुदिन बढ्दै गएको पीठाधीश बाबा अमिरुल्लाह अन्सारीको भनाइ छ ।
श्रद्धाको यस केन्द्रमा चार महत्वपूर्णस्थान छन् । महलबारीमा मस्जिद तथा गुद्दरबाबा, चावलधोइ र उच्च पहाडमा मदारबाबास्थान छन् ।। यसै स्थानमा पुग्न सक्नुलाई सुखको मुहान खुल्नुसरह मानिन्छ । मुख्य केन्द्रका रूपमा रहेको यस स्थानमा बाबा आसीन हुने र त्यहाँ पुग्ने भक्तजन बाबाको आशिष लिई फर्कन्छन् ।
ऐतिहासिक मेलामा हिन्दू र मुसलमान दुवै धर्मका व्यक्ति श्रद्धाका साथ जाने गर्छन् । हिन्दू मुसलमान दुवै धर्मका मान्छे एकै स्थानमा श्रद्धाका साथ आउने समितिका कोषाध्यक्ष रियाजुलहक अन्सारीले बताए ।
मेलामा अत्यधिक भीड हुने भएकाले मेला व्यवस्थापन, शान्ति सुरक्षा, सडक मर्मत, खानेपानी व्यवस्थापन लगायत आवश्यक सबै तयारी मिलाइएको समितिका अध्यक्ष निजामुद्दिन मियाँको भनाइ छ ।
आजभन्दा ६०१ वर्ष पहिले यहाँ मुसलमान समुदायका धर्मगुरुले यस क्षेत्रमा समाधिस्थल बनाई पूजाआजा गरेकामा बाबा मरेपछि पछिल्लो ३०/३५ वर्ष अघिदेखि प्रत्येक वर्ष बाबाको सम्झनामा मेला लागेको मेलाका वर्तमान ठाधीश अन्सारी बताए ।
