जान्नुहोस ! कपाल झर्ने कारणहरु

एनेस्थेसिया र सर्जरी
एनेस्थेसिया र सर्जरी गरेपछि पनि कपाल झर्छ । यिनीहरूको शरीरमा प्रभाव तथा रिकभरीमा ढिलाइले पनि कपाल झर्छ ।

तनाव
कपाल झर्नुका पछाडि तनाव पनि एक कारण हो । लामो समयसम्म तनाव हुँदा शारीरिक र मानसिक स्वास्थ्य बिग्रन थाल्छ अनि कपाल कमजोर भएर टुक्रिन थाल्छ ।

औषधि
केही विशेष औषधिहरू सेवन गर्दा पनि कपाल कमजोर हुन थाल्छ । रगत पातलो बनाउने औषधि, भिटामिन ए सप्लिमेन्टहरू, बाथरोगको अनि निद्राको औषधि सेवन गर्दा पनि कपाल झर्न थाल्छ ।

फंगल इन्फेक्सन र चायाँ
कपालमा फंगल इन्फेक्सन हुँदा त्यो जरैबाट कमजोर भएर टुक्रिन थाल्छ । अनि तालु सुक्खा हुँदा चायाँ पनि पर्छ जसले गर्दा कपाल कमजोर भएर टुक्रिन थाल्छ । कपालको सफाइ र पोषणमा ध्यान दिनुभए मात्र यस्ता स्थितिबाट बच्न सक्नुहुन्छ ।

गर्भधारण र रजोनिवृत्ति
गर्भवती अवस्थाका महिलामा एस्ट्रोजन हर्मोनको सन्तुलन बिग्रन्छ र कपाल तीव्र गतिका साथ झर्छ । त्यसबाहेक रजोनिवृत्तिका समयमा एस्ट्रोजनको मात्रा घटेर पनि कपाल झर्न थाल्छ ।

आनुवंशिक कारण
बाआमाको कपाल झर्ने समस्या छ भने सन्तानको पनि कपाल झर्छ । यसबाट बच्नका लागि केही विशेष काम गर्न सकिन्न तर खानपान र जीवनशैलीलाई राम्रो बनाएर समस्या घटाउन सकिन्छ ।

थाइरोइड
कपाल असाध्यै कमजोर भएर झर्नुमा थाइरोइड पनि एक कारण हुन सक्छ । थाइरोइडको उपचार गराएपछि कपाल झर्ने समस्या पनि समाधान हुन्छ ।

कपालसम्बन्धी औजार
तपाईं दिनदिनै कपाललाई स्ट्रेट गर्न वा कर्ली गर्नका लागि स्ट्रेटनर र कर्लर जस्ता औजार प्रयोग गर्नुहुन्छ वा दिनदिनै चिसो कपाल सुकाउन ड्रायर प्रयोग गर्नुहुन्छ भने तिनले तपाईंको कपाललाई जरैदेखि कमजोर बनाउँछन् । त्यसपछि कपाल टुक्रिने, झर्ने र मृतजस्तो हुने समस्या आउँछ ।

रसायन
दिनदिनै नयाँ हेयरस्टाइल बनाउने र कपाल रंगाउने गर्दा तिनमा भएका रसायनले कपाललाई कमजोर बनाउँछन् र पोषण सिध्याइदिन्छन् । अनि कपाल झर्न थाल्छ । यस्ता उत्पादनको प्रयोगले कपाल सेतो पनि हुन थाल्छ ।