सासू हत्या गर्ने बुहारीलाई जन्मकैद

जाजरकोट, ४ फाल्गुन : सासूको हत्या गर्ने बुहारीलाई जिल्ला अदालत जाजरकोटले सर्वस्वसहित जन्मकैद सुनाएको छ । भेरी नगरपालिका–१ रिम्नाकी भवानी रानालाई सासू हत्या अभियोगमा अदालतले सर्वस्वसहित जन्मकैदको सजाय सुनाएको हो ।

घट्ट बेचेको ६ हजार रुपैयाँ नदिएको भन्दै कात्तिक २४ गते भेरी नगरपालिका–१ की पुनिकला रानाको भवानीले हत्या गरेकी थिइन् । जिल्ला न्यायाधीश देवकुमार गिरीको एकल इजलासले बिहीबार उक्त फैसला सुनाएको हो ।

सासु पुनिकलाको टाउको र कन्चटमा लागेर घटनास्थलमै ज्यान गएको प्रहरीले जानकारी दिएको छ । भवानीले सासू पुनिकलालाई बोतलले हिर्काएर हत्या गरेको प्रमाणसहित अदालतमा कर्तव्य ज्यानसम्बन्धी मुद्दा दर्ता भएको थियो । यससँगै उनलाई जिल्ला अदालतले पुर्पक्षका लागि कारागार चलान गर्ने आदेश दिएको थियो । हत्या अभियोग लागेकी भवानीको एक वर्षीय छोरा छन् ।

अन्नपूर्ण पोष्ट