प्रधानमन्त्री केपी शर्मा ओली ६६ वर्ष पुरा भई ६७ वर्षमा प्रवेश गरेका छन् । उनले आफ्नो जन्म दिन प्रधानमन्त्री निवास बालुवाटारमा मनाएका छन् । एमाले स्थायी कमिटी बैठकमा ‘केक काटेर’ प्रधानमन्त्री ओलीले जन्मोत्सव मनाएका हुन् ।
स्थायी कमिटी बैठक चलिरहेको समयमा ओलीको जन्मोत्सव मनाइएको हो । उनलाई वरिष्ठ नेता माधवकुमार नेपालले पुष्प गुच्छा दिएर जन्म दिनको शुभकामना दिँदै सफल कार्यकालको पनि शुभकामना दिएका थिए ।
पार्टीको तर्फबाट केन्द्रीय कार्यालय सचिव कृष्ण गोपाल श्रेष्ठले प्रधानमन्त्री ओलीलाई केक खुवाएर शुभकामना दिएको प्रेस संयोजक चेतन अधिकारीले जानकारी दिए ।
बैठकमा उपस्थित एमाले नेताहरुले पालैपाले उनलाई शुभकामना दिएका थिए । यसैगरी समाचार संकलनका लागि बालुवाटार पुगेका सञ्चारकर्मीहरुले पनि प्रधानमन्त्री ओलीलाई जन्मदिनको शुभकामना दिएका छन् ।
२००८ साल फागुन ११ गते इवा २, तेह्रथुममा उनको जन्म भएको हो । उनी ३ फागुनमा प्रधानमन्त्रीमा नियुक्त भएका थिए । अघिल्लोपटक प्रधानमन्त्री हुँदा पनि ओलीले बालुवाटारमा यसै गरी जन्मदिन मनाएका थिए ।
