अनुष्का भूत बनेपछि

एजेन्सी: भारतीय क्रिकेटर विराट कोहलीसँग वैवाहिक जीवन प्रारम्भ गरेपछि अभिनय गरेको चलचित्र परी : नट अ फेयरी टेलमा अभिनेत्री अनुष्का शर्मा पहिलो पटक भूतको भूमिकामा प्रस्तुत हुँदैछिन् । अनुष्काको होम प्रोडक्सनको उक्त चलचित्रमा उनले दोहोरो भूमिका निर्वाह गरेकी छिन् ।
एकातिर उनी परिको भूमिकामा छिन् भने अर्कातिर भूत पनि बनेकी छिन् । चलचित्रको टिजर हालै मात्र सार्वजनिक भएको छ । भनिन्छ, यो चलचित्र आफ्नो शीर्षक परीभन्दा बिल्कुलै भिन्न छ । यो एउटा परीको कथामा आधारित नभै हरर चलचित्र हो ।

त्यसो त डरलाग्दो टिजरले नै यो चलचित्र भूतसँग सम्बन्धित छ भन्ने कुरा प्रमाणित गरिसकेको छ । टिजरमा अनुष्काको भयानक रूपले सबैलाई डराउन बाध्य तुल्याउँछ । सुन्दर तथा निर्दोष अनुष्काको पछाडि भूतको छायाँ छ । सिक्री समातेकी अनुष्का भूतसँग प्रतिस्पर्धा गर्छिन् ।

रगतले लतपतिएको अनुहार, सानी बालिका, डरलाग्दो ठाउँ तथा परीको भयानक रूप— छोटो टिजरमा सबै कुरा अटाएका छन् । बलिउडका अधिकांश हरर चलचित्र असफल भए पनि अनुष्काको यो चलचित्रबाट भने राम्रो आशा गरिएको छ ।