नयाँ दिल्ली (एजेन्सी)- बलिउड सुपरस्टार सलमान खानको देश-विदेशमा करोडौं प्रशंसक छन्। यति धेरै फ्यान फ्लोइङ रहेका सलमानको सुरक्षाको जिम्मेवारी करिब २० वर्षदेखि शेराले सम्हाल्दै आएका छन्।
सलमानको सुरक्षाका लागि अहोरात्र खट्ने भएकाले शेरालाई उनको एजेन्सीको तर्फबाट ‘बेस्ट सेक्युरिटी अवार्ड’ बाट सम्मान गरिएको छ। उनलाई यो अवार्ड चर्चित बलिउड अभिनेत्री माधुरी दीक्षितले दिएकी हुन्। अवार्ड लिने क्रममा शेरा निकै खुसी देखिन्थे।
सलमानको सुरक्षाका लागि शेरा छाया जस्तै हरबखत तैनाथ रहन्छन्। बलिउडमा व्यक्तिगत सुरक्षागार्डको नाम लिनासाथै सबैभन्दा अगाडि शेरालाई नै सम्झिने गरिन्छ। उनको परिचय सुरक्षागार्डभन्दा पनि एक सेलिब्रिटीको रुपमा बन्न थालेको छ।
सलमानले आफ्नो फिल्म ‘बडिगार्ड’मा शेरालाई पनि अभिनयको मौका दिएका थिए। फिल्मको शीर्ष गीतमा शेरा गाउँदै र नाच्दै गरेको देखिएका थिए। गीतमा मुख्य रुपमा सलमान र केटरिना कैफको अभिनय थियो।
