कैलाली, २८ फागुन २०७४
कैलालीको घोडाघोडी नगरपालिका-५ मा बोक्सीको आरोपमा कुटपिट गरिएकी राधा चौधरीको न्यायको माग गर्दै विभिन्न विद्यार्थी संगठनहरुले घटनाको विरोध सभा गरेको छ ।
कैलालीको सुख्खडमा सम्पन्न सो विरोध सभामा अनेरास्ववियु लगायतका विद्यार्थी संगठनहरु सहभागी भएका थिए ।
उक्त बिरोध सभामा बोक्सी प्रथा उन्मुलन अभियानको प्लेकार्ड बोकेर र्याली समेत गरिएको थियो । सभामा पिडित राधालाई काठमाण्डौंमा उपचार गर्नुपर्ने, उनको उच्च शिक्षाका लागि निशुल्क र उचित व्यवस्थापन गरिनुपर्ने जस्ता माग राख्दै विद्यार्थीहरुले नाराबाजी गरेका थिए ।
पिडित चौधरीको परिवारलाई उचित क्षतिपुर्तिको व्यवस्था गर्नुपर्ने उनको सम्पुर्ण रुपमा भविष्यको ज्ञारेन्टि गरिनुपर्ने तथा सरकारबाट क्षतिपुर्तिको व्यवस्था गर्नुपर्ने मागहरु आफुहरुले राखेको अनेरास्ववियु केन्द्रिय कमिटि सचिव सुदेश पराजुलीले जानकारी दिए ।
रामबहादुर चौधरी उर्फ भोलेबाबा लगायत दोषी सम्पुर्ण अपराधीहरुलाई आजीवन कारकागारको सजाय तोक्न परि विद्यार्थीहरुले माग गरेका छन् ।
गत विहीबार नारी दिवसका दिन झाँक्री रामबहादुर चौधरी र किस्मती चौधरीले स्थानीय छात्रा राधा चौधरीलाई बोक्सीको आरोपमा सयौं गाउँलेका अगाडि छ घण्टासम्म निर्घात कुटपिट गरेका थिए ।
घटनाको दोषीहरुमध्ये रामबहादुर चौधरी र किस्मती चौधरी भने पक्राउ परिसकेका छन् ।
