बिहे गर्न नमानेको भन्दै युवतीको अनुहारमा छ्यापियो तातो घिउ

कैलालीमा बोक्सीको आरोपमा किशोरीमाथि निर्घात कुटपिट गरिएको घटना सेलाउन नपाउँदै छिमेकी जिल्ला कञ्चनपुरमा आफूसँग बिहे गर्न नमानेको भन्दै युवतीको अनुहारमा तातो घिउ छ्यापिएको छ । भीमदत्त नगरपालिका–१० गड्डाचौकीका राजेश चन्दले बुधबार बिहान वडा नम्बर ५ बनगाउँकी २१ वर्षीया सुनिता चन्दको अनुहारमा तातो घिउ छ्यापेका हुन् । उनलाई थप कुटपिट पनि गरेर राजेश फरार छन् ।

बिहान घरमै पूजापाठका लागि घिउ तताइरहेका बेला राजेश आएर आफूसँग विवाह गर्न दबाब दिएको सुनिताले बताइन् । ‘मैले बिहे गर्दिनँ भन्दा तातो घिउ अनुहारमा छ्याप्यो र कुटपिट गरेर भाग्यो,’ उनले नयाँ पत्रिकासँग भनिन् । सुनिता स्नातक तह तेस्रो वर्षकी विद्यार्थी हुन् ।

तातो घ्यूले उनको अनुहारमा घाउ भएको छ । आँखा अझै खुल्न सकेका छैनन् । उनलाई उपचारका लागि तत्काल महेन्द्रनगर आँखा अस्पताल पुर्‍याएका थिए । त्यहाँ उपचार हुन नसकेपछि कैलालीस्थित गेटा आँखा अस्पताल लगिएको थियो । उपचारपछि केही सन्चो भए पनि दुवै आँखा अझै खुलेका छैनन् । ‘औषधिले केही बिसेक त भएको छ, तर दुवै आँखा बन्द नै छन्’ सुनिताका दाइ शंकरले भने । उनलाई उपचारपछि बुधबार नै घर ल्याइएको छ । ‘नियमित उपचार गर्नुपर्नेछ, सजिलोका लागि घर ल्याएका छौँ,’ उनले भने ।

तातो घिउ छ्याप्दै कुटपिट गरेर भागेका राजेश फरार छन् । सुनिताकाे परिवारले जिल्ला प्रहरी कार्यालय, कञ्चनपुरमा किटानी जाहेरी दिएका छन् । उनको खोजी भइरहेको र कारबाही गरिने एसपी ज्ञानबहादुर सेठीले बताए । ‘राजेशलाई पक्राउ गर्न प्रहरी परिचालन गरिएको छ, उनीमाथि ज्यान मार्ने उद्योगअन्तर्गत मुद्दा चलाउने तयारी गरेका छौँ,’ एसपी सेठीले भने ।

तीन महिनाअघि जिप्रकामै मिलापत्र
बिहे गर्न नमानेको भन्दै तीन महिनाअघि पनि राजेशले सुनितालाई कुटपिट गरेका थिए । उनले सात–आठ महिनादेखि सुनितालाई बिहेका लागि दबाब दिँदै आएको परिवारका सदस्यले बताए । सुनिताले ‘बिहे गर्दिनँ’ भनेपछि मंसिरमा पनि कुटपिट गरेका थिए । ‘कलेज आउँदा–जाँदा पनि दबाब दिइराख्दोरहेछ, नाइँ भन्दा कुटपिट गर्दोरहेछ,’ सुनिताकी आमा जयन्तीले भनिन् ।

दुःख दिने, कुटपिट गर्ने गरेको विषयमा सुनिताले घरमा बताएकी थिइनन् । तीन महिनाअघि भने सुनिताले आमालाई भनेकी थिइन् । परिवारजनले प्रहरीमा उजुरी दिएपछि उनी पक्राउ परेका थिए । तर, त्यतिवेला जिल्ला प्रहरी कार्यालयमै मिलापत्र गरिएको थियो । ‘तीन महिनाअघि पनि राजेशले छोरीलाई कुटेका थिए, अबउप्रान्त कुटपिट नगर्ने वचन दिएपछि जिप्रकामा मिलापत्र गरेका थियौँ,’ जयन्तीले भनिन् ।

यस्तो थियो घटना
सुनितालाई मन पराएको र बिहे गर्छु भन्दै राजेश घरमै माग्न आएका थिए । परिवारजनले पनि ‘जोडमेल भयो भने गरौँला’ भनेका थिए । ज्योतिषीलाई चिना हेराउँदा नाता परेकाले बिहे गर्न नमिल्ने देखिएको उनका दाइ शंकरले बताए । ‘घरमा आएका थिए, दुवै परिवारको नजिकको नाता पर्ने भएकाले विवाह गरिएन,’ उनले भने ।

त्यसपछि राजेशको परिवारले मंसिरमा अन्तैबाट बिहे गरेका थिए । तर, राजेशले भने सुनितालाई दुःख दिन छोडेका थिएनन् । (नयाँ पत्रिका)