काठमाडौं, ६ चैत्र
परराष्ट्रमन्त्री प्रदिप कुमार ज्ञवाली चाँडै भारत भ्रमणमा जाने तयारीमा रहेका छन् । स्रोतका अनुसार उनी प्रधानमन्त्री केपी शर्मा ओलीको भारत भ्रमण र भारतीय प्रधानमन्त्रीको नेपाल भ्रमणको कार्यतालिका मिलाउनको लागि भारत जान लागेका हुन् ।
भारतीय विदेशमन्त्री सुष्मा स्वराजले हिजोमात्रै मन्त्री ज्ञवालीलाई बधाई दिएकी थिईन् । बधाईसँगै उनले भारत भ्रमणको पनि निम्तो दिईएको स्रोतले जनाएको छ । सोही अनुसार उनी चाँडै भारत भ्रमणमा जान लागेका हुन् ।
निर्वाचन सम्पन्न भएसँगै भारतीय प्रधानमन्त्री मोदीले ओलीलाई बधाई दिनुको साथै भ्रमणको निम्तो दिएका थिए । उनले फोनमा ओलीसँग भनेका थिए,‘तपाईलाई भारतमा स्वागत गर्न आँतुर छौं, सहकार्य गर्न तयार छौं।’
यता ओलीले पनि मोदीलाई नेपाल भ्रमणको निम्तो दिईसकेका छन् । दुवै प्रधानमन्त्रीले नयाँ वर्षको शुभकामना एक–आपसमा आदानप्रदानसँगै द्धिपक्षीय भ्रमणको बारेमा कुराकानी गरेका थिए ।
परराष्ट्रमन्त्री ज्ञवालीको यो तयारीसँगै प्रधानमन्त्री ओलीले पहिलो विदेश भ्रमण भारतबाटै सुरु गर्ने आँकलन गर्न सकिन्छ । केही दिनअघिमात्रै मन्त्री ज्ञवालीले रिपोर्टर्स क्लब नेपालको विशेष साक्षात्कारमा प्रधानमन्त्री ओलीले पहिलो विदेश भ्रमण भारत नै गर्न सक्ने संकेत गरेका थिए ।
