इस्लामावाद, १५ चैत
सन् २०१४ मा नोबेल शान्ति पुरस्कार प्राप्त गर्न सफल पाकिस्तानी नागरिक मलाला युशुफजाई बिहीबार पाकिस्तान फर्किनुभएको छ ।
हाल २० वर्ष पुगेकी युशुफजाइले १४ वर्षको उमेरमा उक्त पुरस्कार हात पार्न सफल हुनुभएको थियो । हाल उहाँले एकजना बाल अधिकारकर्मीका रुपमा काम गरिहनुभएको छ ।
उहाँलाई १४ वर्षकै उमेरमा पाकिस्तानी तालिबान लडाकूहरूले गोली प्रहार गरी हत्या प्रयास गरेका थिए । त्यसपछि गम्भीर घाइते उहाँको बेलायतमा उपचार भएको थियो ।
मुस्लिम देश पाकिस्तानमा प्राय बालिका शिक्षालाई त्यति प्राथमिकता नदिने गरेको र त्यहाँका कट्टरपन्थी पाकिस्तानी लडाकूहरु, तालिबानले बालिका शिक्षालाई अनुमति नदिने गरेकोमा उहाँले भने बालिका शिक्षाको वकालत गर्नुभएको थियो ।
यसरी पाकिस्तानमा बालिका शिक्षाको पक्षमा अभियान चलाएका कारण नै उहाँलाई तालिबानहरुले सन् २०१२ मा गोली हानेका थिए । टाउकोमा गोली लागेर गम्भीर घाइते भएकी उहाँको बेलायतको बर्मिङ्घमको एक अत्याधुनिक अस्पतालमा उपचार भयो ।
पछि उहाँको परिवार त्यहीँ बस्न थालेको हो । उहाँले अक्सफोर्ड विश्वविद्यालयमा अध्ययनगर्दै बालिका शिक्षासम्बन्धी अभियान पनि जारीराख्दै आउनुभएको छ ।
त्यस घटनापछि उहाँ पहिलो पटक पाकिस्तान फर्किनुभएको हो । उहाँ बुधबार राति इस्लामावादको एक अन्तर्राष्ट्रिय विमानस्थलमा अवतरण गर्नुभएको हो ।
सुरक्षा संवेदनशीलताका कारण उहाँको पाकिस्तान भ्रमणसम्बन्धी कुनै पनि विस्तृत कार्यक्रमहरु भने गोप्य रखिएको छ ।
उहाँलाई तालिबानहरुले अहिले पनि धम्की दिइरहेकोले उहाँको भ्रमणका समयमा हुनसक्ने घटनालाई हृदयंगम गरी यसरी सुरक्षा सतर्कता अपनाइएको समाचारमा जनाइएको छ ।
मलालाले पाकिस्तानी प्रधानमन्त्री शाहिद खकान अब्बासीसँग पनि भेटवार्ता गर्ने कार्यक्रम रहेको बताइएको भए पनि भेटको समय भने केही दिइएको छैन ।
उहाँको पाकिस्तान आगमनसँगै सुरक्षा व्यवस्था निकै कडा बनाइएको छ । इस्लामाबादस्थित बेनजिर भुट्टो अन्तर्राष्ट्रिय विमानस्थलमा उहाँ आफ्ना आमाबुबासँगै अवतरण गर्नुभएको दृश्य पाकिस्तानी टिभीहरुले देखाएका छन् ।
मलालाले आफ्नो अध्ययन सकेपछि पाकिस्तानको प्रधानमन्त्री बन्ने र यहाँका महिला तथा बालबालिकाको अधिकारमा कामगर्ने उद्देश्य रहेको यसअघि बताउँदै आउनुभएको थियो ।
