तीते करेला वैज्ञानिक वर्गीकरण अनुसार फूलफुल्ने वनस्पतिको समूहमा पर्ने एक वनस्पति हो। तीते करेलालाई संस्कृतमा कंटफल, उग्रकाँड र हिन्दीमा करेला नै भनिन्छ। अङ्ग्रेजीमा भने यसलाई बिटर मेलन वा बिटर गार्ड पनि भन्ने गरिन्छ। हेर्नमा हरियो र सेतो, स्वादमा तीते करेला खनिज पदार्थयुक्त तथा औषधीय गुणले भरपूर सब्जी हो। खाँदा तीतो भए पनि करेला स्वास्थ्यका लागि अति लाभदायक छ । सब्जीको रूपमा प्रयोग गरिने करेला लहरामा फल्ने फल हो।
आज हामी करेलाको मिठो तरकारी बनाउने विधि लिएर आएका छौ।
आवश्यक सामग्री :
ठिकको ४ वटा वा ४०० ग्राम तिते करेला
१ कप काटेको गोलभेँडा
२ ३ वटा काटेको हरियो खोर्सानी
१ ठूलो काटेको प्याज
कागती १ वटा
बेसारको धुलो आधी चम्चा
जिरा र धनियाँको दाना आधी आधी चम्चा
गरम मसाला आधी चम्चा
पिसेको अदुवा लसुन १ चम्चा
रातो धुलो खोर्सानी १ चम्चा
तेल ३० मि.लि
नुन स्वाद अनुसार
बनाउने विधि :
सर्वप्रथम कराईमा तेल तताउनुहोस् र त्यसमा जिरा, धनियाँ, र हरियो खोर्सानी हाल्नुहोस् । त्यसपछि यसमा काटेको प्याज हालेर फ्राइ गर्नुहोस् । हल्का प्याज फ्राइ गरिसकेपछि यसमा बेसार र करेला राखेर राम्ररी चलाउनुहोस्।
राम्रोसँग चलाइसकेपछि यसलाई छोप्र कम्तिमा पनि १० मिनेट पकाउनुहोस्। बिच बिचमा यसलाई चलाइदिनुहोस्। यो चलाउनु चाहिँ चारैतिर राम्ररी पाकोस् र नडढोस् भन्नका लागि हो। अब यसमा गोलभेँडा र अन्य मसला हालेर राम्रोसँग चलाउनुहोस् र मध्यम तापमा पकाउनुहोस् ।
राम्रो सँग चलाइसकेपछि फेरी एकपटक छोपेर यसलाई कम्तिमा पनि १० मिनेटसम्म सानो आगोमा पकाउनुहोला। तरकारी पाकिसकेपछि यसमा कागतीको रस राख्नुहोस् र राम्ररी चलाउनुहोस्। अब पस्किनुस्।
