काठमाडौं २५ चैत: घटना १: प्रधानमन्त्री केपी शर्मा ओलीलाई बधाई दिन भन्दै पाकिस्तानी प्रधानमन्त्री साहिद खकान अब्बासी फागुन २१ गते दुईदिने नेपाल भ्रमणमा आएका थिए ।
घटना २: त्रिभुवन विमानस्थलमा फागुन २८ गते भएको बङ्गलादेशको यूएस विमान दुर्घटनापछि बुझ्न बङ्गलादेशका नागरिक उड्डयन तथा पर्यटनमन्त्री एकेएम शाहजहाँ कमाल फागुन २९ गते नेपाल आएका थिए ।
घटना ३: चैत ३ गते गोरखा गण्डकी गाउँपालिका ३ बेनीघाटमा मुस्लिमहरूको ठुलो कार्यक्रम भएको थियो भने त्यहाँ सहभागीमध्ये ५ सय बढी पाकिस्तानलगायत अरब मुलुकका मुस्लिम थिए । यी सबै घटनाका प्रमुख पात्रहरू त्रिभुवन विमानस्थल भएर अवतरण भएका हुन् ।
२ अलि फरक भए पनि १ र ३ घटनामा भने सुरक्षाको हिसाबमा अलि चासोको विषय हो । नकि यी घटना भएलगत्तै विमानस्थल भएर बाह्य गुप्तचरका एजेन्टहरू व्यापक रूपमा आवतजावत गरेको बताइन्छ ।
विशेष गरी भारतका बाह्य गुप्तरच रसगठन रअ, पाकिस्तानी गुप्तचर सङ्गठन आईएसआई इन्टर सर्भिस इन्टेलिजेन्सका एजेन्टहरू सक्रिय भएको बुझिन्छ ।
विमानस्थल प्रयोग गरेर आवतजावत गर्ने विशिष्ट, विशिष्टका पूर्ण विवरण राख्ने, पहिचान गर्ने कार्य विमानस्थलमा रहेको राष्ट्रिय अनुसन्धान विभागको विमानस्थल निगरानी उपशाखाले गर्दछ ।
यी घटनाहरूमा विमानस्थल भएर नेपाल आइसकेका विशिष्ट र अतिविशिष्ट पात्रका विवरण विमानस्थल उपशाखाबाट आउँदै नआउनुले विभागका अधिकारीले त्यहाँका गुप्तचरहरूमा व्यक्ति पहिचान गर्ने समस्या रहेको निष्कर्ष निकाल्दै विभागभित्रै खैलाबैला मच्चिएको विभागकै उच्च अधिकारी बताउँछन् । यो समाचार आजको नेपाल समाचारपत्रमा छापिएको छ ।
