म्याड्रिड, ६ वैशाख
रियल म्याड्रिडका फरवार्ड क्रिस्टियानो रोनाल्डोले एथ्लेटिक बिल्बाओसँग ‘ब्याकहिल फ्लिप’ गोल गर्दै रियललाई घरेलु मैदानमा हारबाट जोगाए। उक्त गोलसँगै पोर्चुगेली फरवार्ड रोनाल्डोले करियरको व्यक्तिगत कीर्तिमान बराबरी गरेका छन्।
यो गोलसँगै उनले लगातार १२ औं खेलमा गोल गरेका छन्। यो उनको करियरको उत्कृष्ट हो। उनले पछिल्लो १२ खेलमा हरेकमा गोल गर्दै २२ गोल गरेका छन्। उनले ला लिगामा भने ८ औं खेलमा लगातार गोल गरेका हुन्।
यस क्रममा उनले रियल सोसिड्याडविरुद्ध ३ गोल, च्याम्पियन्स लिग अन्तिम १६ को पहिलो लेगमा पिएसजी विरुद्ध २, रियल बेटिस विरुद्ध १, अलाभेस विरुद्ध २, गेटाफे विरुद्ध २, दोस्रो लेगमा पिएसजी विरुद्ध १, ऐबर विरुद्ध १, जिरोना विरुद्ध ४, च्याम्पियन्स लिग क्वाटर फाइनल पहिलो लेगमा युभेन्टस विरुद्ध २, एथ्लेटिको म्याड्रिड विरुद्ध १, दोस्रो लेगमा युभेन्टस विरुद्ध १, र एथलेटिक बिल्बाओ विरुद्ध १ गोल गरे।
ला लिगामा रोनाल्डोले यस सिजन २४ गोल गरिसकेका छन्। प्रतियोगितामा ढिलो लय समातेका रोनाल्डो यस सिजनका उच्च गोलकर्ता लियोनल मेस्सी भन्दा ५ गोल पछि छन्। -(एजेन्सी)
