म्यानचेस्टर, १० वैशाख
प्रिमियर लिग च्याम्पियन म्यानचेस्टर सिटीले गए राती स्वान्सी सिटीलाई ५ – ० ले हराएको छ । घरेलु मैदानमा सिटीलाई जित दिलाउन डेभिड सिल्भा, रहिम स्ट्रलिङ,केभिन डी बु्रने, बर्नान्डो सिल्भा र गाब्रियल जिससले गोल गरे ।
सिल्भाको गोलबाट १२ औं मिनेटमा अग्रता लिएको सिटीका लागि स्ट्रलिङले १६ औं मिनेटमा गोल गरे । ५४ औं मिनेटमा बु्रनेको गोलबाट अग्रता ३ – ० बनाएको सिटीका लागि बर्नान्डोले ६४ औं र जिससले ८८ औं मिनेटमा गोल गरे ।
जितपछि ३४ खेलमा सिटीको ९० अंक पुगेको छ । दोस्रो स्थानको म्यानचेस्टर युनाइटेडको भन्दा सिटीको १६ अंक बढी छ । सिटीले उपाधि मे ६ मा उचाल्ने छ । आइतबारको अन्य खेलमा आर्सनलले वेस्ट ह्याम युनाइटेडलाई ४–१ ले हरायो भने स्टोक र बर्नलीले १–१ को बराबरी खेले । -(एजेन्सी)
