म्यानचेस्टर, १७ वैशाख
मराउने फेलानीले इन्जुरी समयमा हेड गोल गरेपछि म्यानचेस्टर युनाइटेडले प्रिमियर लिगमा आइतबार आर्सनललाई २–१ ले हराएको छ । युनाइटेडले १६ औं मिनेटमा पाउल पोग्बाको गोलबाट अग्रता लिएको थियो । उनले नजिकबाट भलीमा गोल गरेका थिए ।
तर, एलेक्स सान्चेजको हेड पोस्टमा लागेर फर्कियो । दोस्रो हाफको छैटौं मिनेटमा युनाइटेडका पूर्व खेलाडी हेरिक मखाटेरियनले आर्सनलका लागि बराबरी गोल फर्काएका थिए । १–१ को बराबरीपछि युनाइटेडका लागि मार्कुस रासफोर्डले गोल गरेपनि त्यसलाई रेफ्रीले अफसाइड लिए ।
परिवर्तित फेलानीको गोलमा युनाइटेडेड जित दर्ता गरायो । दोस्रो स्थानको युनाइटेडले लिभरपुलमाथि ५ अंकको स्पष्ट अग्रता लिएको छ । आर्सनल छैटौं स्थानमा छ । शीर्ष स्थानको म्यानचेस्टर सिटीले यो पटक प्रिमियर लिग उपाधि पक्का गरिसकेको छ ।
आइतबारकै अर्को खेलमा म्यानचेस्टर सिटीले वेस्ट ह्याम युनाइटेडलाई ४–१ ले हरायो । सिटीका लागि लेरोय राने, गाब्रियल जिसस र फेर्नाडिन्होले गोल गरे भने पाब्लो जाबालेटाले आत्मघाती गोल गरे । वेस्टह्यामका लागि आरोन क्रेसवेलले गोल गरे । सिटीको ९३, युनाइटेडको ७७ र लिभरपुलको ७२ अंक छ । – (एजेन्सी)
