काठमाडौं, २० वैशाख २०७५
बाङरिङ्ग ठाकुर बहुउद्देश्यीय युवा क्लब तिनपाटन–१० सिन्धुलीले नयाँ वर्ष २०७५ तथा बुद्ध जयन्तीको सु–अवसरमा आयोजित तिनपाटन गाउँपालिका स्तरीय भलिबल प्रतियोगिता सम्पन्न गरेको छ । २०७५ वैशाख १७ देखि १९ सम्म संचालन भएको प्रतियोगितामा सुनौले युवा क्लब तिनपाटन–१ बेलघारीले विजयी हासिल गरेको थियो ।
विजयी टिमलाई प्रथम पुरस्कार स्वरुप नगद रु.१०,०००।– सहित मेडल, शिल्ड, र प्रमाणपत्र प्रदान गरिएको थियो । प्रतियोगितामा द्वितीय हुने आयोजक टिम बाङरिङ्ग ठाकुर बहुउद्देश्यीय युवा क्लब तिनपाटन–१० र तृतीय टिम न्यु वाक्सुखोला युवा क्लब तिनपाटन–८ लाई क्रमशः नगद रु.७,०००।–/रु.५,०००।– सहित मेडल, शिल्ड, र प्रमाणपत्र प्रदान गरिएको थियो । सान्त्वना पुरस्कार जुगेपानी युवा क्लब तिनपाटन–६ धापले प्राप्त गर्न सफल भयो ।
समापन तथा पुरस्कार वितरण कार्यक्रमको सभापतित्व बाङरिङ्ग क्लबका अध्यक्ष चुडामणी बास्तोले गरेका थिए भने प्रमुख अतिथिमा गाउँपालिका अध्यक्ष कर्ण बहादुर मगर र विशिष्ट अतिथिमा गाउँपालिका उपाध्यक्ष पदममाया तामाङ रहेका थिए । अतिथिहरुमा नेकपा एमाले जिल्ला कमिटि सदस्य रामप्रसाद गौतम, विभिन्न क्बलका प्रतिनिधिहरु सहितको उपस्थिति रहेको थियो । कार्यक्रमको संचालन क्बलको खेलकुद समितिका सचिव नवराज तिमल्सेनाले गरेका थिए ।
