२९ जेठ २०७५, काठमाडौं
गैरआवासीय नेपाली संघ राष्ट्रिय समन्वय परिषद् ओमन (एनसीसी ओमन)ले तयार पारेको ‘हामी एनआरएन’ बोलको गीत आज युट्युव मार्फत सार्वजनिक गरेको छ ।
सुशील पुन ‘विरही’ को शब्द रहेको गीतमा महेश खड्काले संगीत भरेका छन् । दीपक लिम्बु, लक्ष्मी निर्मल कोइराला, माण्डवी त्रिपाठी र सञ्जिता निरौलाको सुमधुर स्वर रहेको गीत परिवर्तन अनलाईन टिभी मार्फत सार्वजनिक गरिएको हो ।
एनसीसी ओमनद्वारा सार्वजनिक गीत
नेपालमा जन्मिएर अध्ययन, पेशा, रोजगारीको शिलशिलामा विश्वका विभिन्न देशहरुमा छरिएर रहेका गैरआवासीय नेपालीहरु एकतावद्ध हुन थालेको एक दशक नाघिसक्यो । प्रवासमा रहँदा उनीहरुले नेपाली कला संस्कृति र पहिचानलाई विश्वभर फैलाएका छन् । समाजसेवा, खेलकुद तथा विभिन्न साँस्कृतिक गतिविधिमा क्रियाशील एनआरएन सदस्यहरुले आफ्ना गतिविधि र भावना समेटेर गीत सार्वजनिक गरेका छन् ।
नेपाली अर्थतन्त्रको मूल हिस्सा रहेको रेमिट्यान्स, नेपाली कला संस्कृति र पर्यटन प्रवर्धनको क्षेत्रमा महत्वपूर्ण योगदान पुर्याईरहेको एनआरएनले भूकम्प, बाढीपिडित, अप्ठ्यारोमा परेका नेपालीहरु तथा गैरआवासीय नेपालीहरुलाई समेत स्थापना कालदेखि सहयोग गरिरहेको छ ।
सार्वजनिक गीतमा नेपाली मौलिक संस्कृति र एनआरएन गतिविधि समेटिएको छ ।
