१६ साउन २०७५, काठमाडौं
पर्यटन तथा नागरिक उड्डयन मन्त्री रविन्द्र अधिकारी लुम्बिनी विकास कोषको उपाध्यक्ष र कार्यकारी निर्देशक नियुक्तिमा विवादमा तानिएका छन् । यस अघि उनी केही निर्णयका कारण विवादमा आएका थिए ।
बिहीबारको मन्त्रीपरिषद बैठकले कोषको उपाध्यक्षमा अवधेशप्रसाद त्रिपाठी र कार्यकारी निर्देशकमा विष्णुप्रसाद ढकालाई नियुक्त गरेको थियो ।
आजको दृष्टि साप्ताहिकले निजामती सेवामा भ्रष्ट कर्मचारीको रुपमा चिनिने पाल्पाका प्रमुख जिल्ला अधिकारी रहेका ढकाललाई नियुक्त गरेर मन्त्री अधिकारी विवादमा तानिएको समाचार लेखेको छ ।
ढकालको जागिर अवधि एक डेढ महिना मात्र वाँकी रहेको समाचारमा उल्लेख छ ।
दृष्टि साप्ताहिकको समाचारमा ललितपुरको स्थानीय विकास अधिकारी हुँदा ढकालले ढुंगा गिटी र क्रसरवालासँग मिलेर करोडौं भ्रष्टाचार गरेपछि धेरै विवादमा तानिएको पनि उल्लेख छ ।
यसैबीच, कोषको उपाध्यक्षमा नियुक्त भएका त्रिपाठीलाई यसअघि शेरबहादुर देउवा सरकारले पनि कोषमा उपाध्यक्ष बनाएको थियो ।
देउवाले नियुक्त गरेका त्रिपाठी नेकपाका लागि पनि फिट भएका र यसमा आर्थिक लेनदेन भएको दृृृष्टि साप्ताहिकको समाचारमा छ ।
लुम्बिनी विकास कोषको उपाध्यक्ष र कार्यकारी निर्देशक नियुक्तिमा खराव मात्र चयन गरेर मन्त्री अधिकारी विवादमा आएको दृष्टिले समाचार लेखेको छ ।
