०२ असोज २०७५, काठमाडौं
प्रधानमन्त्री केपी शर्मा ओलीले न्याय दिलाउने प्रतिवद्धता जनाएसँगै बलात्कारपछि हत्या गरिएकी कञ्चनपुरकी बालिका निर्मला पन्तको बुवाआमा आज घर फर्केका छन् ।
निर्मलाका बुवा यज्ञराज र दुर्गादेवी पन्त गृह जिल्ला फर्किएका हुन् । बलात्कार र हत्याको घटनामा संलग्न अपराधी जोसुकै भए पनि कडा कारबाही गर्ने विषयमा हिजो प्रधानमन्त्री ओलीले प्रतिवद्धता जनाएका थिए ।
बालुवाटार पुगेका निर्मलाका बुबाआमासहित प्रदेश ७ का सांसदसँगको भेटमा प्रधानमन्त्री ओलीले धन, बल, दल वा ओहोदा कुनै हिसाबले शक्तिशाली भए पनि दोषी उम्कन नसक्ने बताएका थिए । घटना मानवतामाथिकै कलङ्क र जघन्य अपराध भएकाले कडाइका साथ छानबिन र कारबाही गर्न आफूले निर्देशन दिएको प्रधानमन्त्री बताए ।
