१४ असोज २०७५, काठमाडौँ
नायिका प्रियंका कार्की र रेखा थापा दुवै नेपाली चलचित्रका नाम चलेका नायिकाहरु हुन् । यी दुवै नायिकाहरु आलोचनाले होस् वा चर्चाले मिडियामा खुब छाउने गर्छन् । चलचित्रको हिसाबले प्रियंकाभन्दा रेखा धेरै सिनियर हुन् तर ढिलै आएको भएपनि नायिका प्रियंका कार्कीले नेपाली चलचित्र क्षेत्रमा आफ्नो निकै राम्रो छवि बनाइसकेकी छिन् । कुनै समयमा यी दुवै नायिकाको नामले मात्र चलचित्र चल्थ्यो भने आजभोली दुवै नायिकाको स्टारडम घट्दै गएको छ । यी दुई एकअर्काका एकदमै मिल्ने साथीहरु पनि हुन् । प्राय कार्यक्रममा यी दुई सँगै देखिने गर्छन् ।
आजभोली चलचित्र जुध्नु सामान्य कुरा भैसकेको छ । बर्षभरि धेरै चलचित्रहरु प्रदर्शन हुने गर्छन् त्यसमध्ये कमै चलचित्रले मात्र सिगंल प्रदर्शन गर्न पाउँछन् । वास्तवमा चलचित्र जुध्नु राम्रो कुरा होइन । यसले एकैसाथ प्रदर्शनमा आएका चलचित्रको व्यापारमा घाटा पर्न जान्छ भने कलाकारको स्टारडममा पनि आँच आउँछ । यस्तैमा अब नायिका प्रियंका कार्की र रेखा थापा पनि एकअर्काको आमने सामने आउने भएका छन् । नायिका रेखाथापाद्धारा निर्मित् चलचित्र मालिका कार्तिक २२ देखि देशभर प्रदर्शनमा आउने भनिएको थियो तर त्यहि मितिमा बलिउड बहुप्रतिक्षित चलचित्र ठग्स अफ हिन्दुस्तान पन प्रदर्शनमा आउने भएपछि नायिका रेखा थपाले आफ्नो चलचित्रको प्रदर्शन मिति १ हप्ता अघि सारेर कार्तिक १६ लाई तय गरेकी छिन् । कार्तिक १६ मा नायिका प्रियंका कार्की र नायक आयुष्मान देशराज जोशी अभिनित चलचित्र चङ्गा चेट पनि प्रदर्शनमा आउने भएको छ ।
पछिल्लो समयमा यी दुवै नायिकाहरुको चलचत्रि असफल भैरहँदा यिनीहरुको स्टारडम पनि घट्दै गएको छ । दुवैको आश बोकेको चलचित्र भनेको अब चङ्गा चेट र मालिका नै हुन् । अब दर्शकले कसको चलचित्रलाई बढी माया गर्ने हुन् त्यो भने हेर्न बाँकि नै छ । दुवै चलचित्रका गीतसंगीत यतिबेला बजारमा निकै हिट भैरहेका छन् । नायिका रेखा थापा र प्रियंका कार्की पहिलो पटक एकआपससँग भिड्दैछन् ।
