पहिलो पटक चलचित्र निर्देशन गर्दै चर्चित नायक विराज भट्ट

१२ कार्तिक २०७५, काठमाडौँ

नायक विराज भट्ट नेपाली चलचित्र क्षेत्रका नाम चलेका र चर्चित अभिनेता हुन् ।कुनै समयमा विराज भट्टको नाम र एक्सनले नै चलचित्र सुपरहिट हुने गर्थे । पछि विराज भोजपुरी चलचित्रहरुमा पनि निकै छाउन  र नेपाली चलचित्रमा कम देखिन थालेका थिए । अहिले विराज नेपाली चलचित्रमा त्यति देखिएका छैनन् । उनले लामो समयको अन्तरालपछि २ बर्ष अगाडि जय पर्शुराम नामक चलचित्रमा काम गरेका थिए तर विडम्बना उक्त चलचित्र असफल साबित भयो ।

अब विराज भट्ट फेरि नेपाली चलचित्र क्षेत्रमा कमब्याक गर्दैछन् । उनी नायक रुपमा त परिचित थिए नै तर दर्शकले अब विराजलाई निर्माता र निर्देशकका रुपमा पनि देख्न पाउने भएका छन् । विराजले साङ्लो नामक चलचित्र निर्माण गर्ने भएका छन् भने उक्त चलचित्रको निर्देशन पनि विराज स्वयमले गर्दैछन् ।

यतिबेला चलचित्रको लागि नायिकाको खोजी भैरहेको छ । प्राप्त जानकारी अनुसार यतिबेला विराज चलचित्रको लागि नायिका साम्राज्ञी र प्रियंकासँग कुरा गरिरहेका छन् । चलचित्रको एक गीत रेकर्ड पनि भैसेकेको छ । चलचित्र मङ्सिरपछि छायांकनमा जाने विराजले जानकारी गराएका छन् । लामो समयपछि विराजले कमब्याक गरेकाले यो चलचित्र विराजका फ्यानहरुका लागि प्रतिक्षित बन्नेछ ।