११ मंसिर २०७५, काठमाडौं
शहिद स्मारक ए डिभिजन लिग अन्तर्गत आज भएको खेलमा मनाङ मर्स्याङ्दीले एपीएफलाई पराजित गर्दै शीर्ष स्थानमा उक्लिएको छ ।
सातदोबाटोस्थित एन्फा कम्प्लेक्समा भएको खेलमा मनाङले एपीएफलाई २–१ को गोलअन्तरले हराएको हो । खेलको १९ औं मिनेटमा भएको गोलबाट अग्रता पाएको मनाङले खेलको निर्धारित समयसम्म आईपुग्दा एपीएफविरुद्ध २ गोल हान्न सक्यो । एपीएफविरुद्धको जितसंगै मनाङले आफ्नो अपराजित यात्रा कायम राखेको छ । यसअघि मनाङले उपाधि दाबेदार थ्री स्टार, एनआरटी र ब्रिगेड ब्वाईजलाई पराजित गरेको थियो ।
मनाङले ४ खेलमा ४ जित निकाल्दै १२ अंक जोडेको छ । मनाङले त्रिभुवन आर्मी क्लबलाई २ अंकले पछि पार्दै शीर्ष स्थान हात पारेको हो । आर्मीको १० अंक छ । ४ खेलबाट ४ अंक जोडेको एपीएफ नवौं स्थानमा छ ।
