१३ मंसिर २०७५, काठमाडौं
यूएईमा जारी टी–१० लिगको १९ औँ खेलमा नेपाली लेग स्पिनर सन्दीप अनुबन्धित केरला किंग्सले आज नर्थन वारियर्ससँग आफ्नो पाँचौ खेल खेल्दै छ । खेल नेपाली समय अनुसार बेलुका ५ः १५ बाट शारजाह क्रिकेट मैदानमा सुरु हुने जनाईएको छ ।
चार खेलमा १ मा जित र दुईमा हारका साथ पुछारबाट दोस्रो स्थानमा रहेको केरलाले अघिल्लो चरणको आशा कायमै राख्न आजको खेल जित्नै पर्ने हुन्छ । वारियर्सले ४ खेलमा ३ मा जित र १ मा हारका साथ दोस्रो स्थानमा छ । जारी टी–१० लिगमा सन्दीपले ४ खेलमा ८ ओभर बलिङ गर्दै १०।२५ को इकोनमीका रन खर्चेर ६ विकेट लिएका छन् । पहिलो खेलमा पख्तुन्सविरुद्ध २ ओभरमा ३ विकेट लिदैँ ‘म्यान अफ द म्याच’ चुनिएका सन्दीपले दोस्रो खेलमा सिन्धिसविरुद्ध २ ओभरमा १४ रन खर्चेर १ विकेट हात पारे । त्यस्तै तेस्रो खेलमा राजपुत्सबीरुद्ध २ ओभरमा २३ रन खर्चेर २ विकेट हात पार्न सफल भए ।
तर चौथो खेलमा पन्जाब लेजेन्ड्सबीरुद्ध अलि महँगो सावित भएका सन्दीपले २ ओभरमा २८ रन खर्चिदा कुनै विकेट हात पार्न सकेनन् । सन्दीप सर्वाधिक विकेट लिने बलरमा सूचिमा पाँचौ स्थानमा रहेका छन् । क्रिस जोर्डन ८ विकेट लिदै पहिलो र जाहिर खान समान विकेटमा दोस्रो स्थानमा रहेका छन् ।
