२३ मङ्सिर २०७५, काठमाडौँ
मिस नेपाल २०१८ बनेर मिस वर्ल्डमा गएकी नेपाली चेली श्रृङ्खला खतिवडा विभिन्न चरणहरु पार गर्दै मिस वर्ल्डको फाइनलमा पुग्न सफल भएकी थिइन् । हिजो अर्थात् डिसेम्बर ८ मा चिनको सान्यामा मिस वर्ल्ड २०१८ को फाइनल भएको छ ।
उत्कृष्ट २० बाट उत्कृष्ट १२ पुगेकी श्रृङ्खला उत्कृष्ट ५ मा पर्न भने सफल भइनन् । श्रृङ्खलाको मिस वर्ल्डको यात्रा उत्कृष्ट १२ मा टुङ्गिएको छ । तरपनि उनले नेपाललाई निकै गर्व महशुस गराएकी छिन् । किनकी उनीभन्दा अगाडि कोहिपनि नेपाली चेली मिस वर्ल्डका फाइनलमा पुगेका थिएनन् । श्रृङ्खलाले मिस वर्ल्डको दुई ठूला अवार्ड मल्टिमिडिया अवार्ड र ब्यूटि विथ प्रपोज अवार्ड भने जित्न भएकी थिइन् ।
उत्कृष्ट ५ मा परेका ४ सुन्दरीलाई पछि पार्दै म्याक्सिकोकी सुन्दरी बेनेसाले मिस वर्ल्ड २०१८ को ताज जित्न सफल भएकी छिन् । श्रृङ्खलाले मिस वर्ल्डको उपाधी जित्न नसकेपनि ३ करोड नेपालीको मन जितेकी छिन् । उनले फाइनलमा पुगेर विश्वमा नेपाललाई चिनाएकी छिन् ।
