२८ मङ्सिर २०७५, काठमाडौं
बूढानीलकण्ठ नगरपालिका वडा नं १२ मा संचालित त्रि ज्योती माध्यमिक विद्यालयको प्रथम अन्तर विद्यालय स्तरीय फूटबल प्रतियोगिता विद्यालयकै खेल मैदानमा उद्घाटन भएको छ ।
आयोजक त्रि ज्योति मावि र माण्डु एकेडेमी बीच भएको उद्घाटन खेलमा त्रि ज्योति माविले माण्डु एकेडेमीलाइ ८–१ गोलको भारी अन्तरले पराजित गरेको थियो । ब्रेन ल्याण्ड एकेडेमी र सारदा एकेडेमी बीच दोश्रो खेलमा सारदा एकेडेमीले ब्रेन ल्याण्ड एकेडेमीलाई १०–० गोल अन्तरले पराजित गरेको थियो ।
उपत्यका भित्रका विभिन्न विद्यालका २२ वटा टिमले सहभागिता जनाएको उक्त प्रतियोगिताको उद्घाटन प्रमुख अतिथि प्रदेश नं ३ का प्रदेश सभा सदस्य न्हुच्छे नारायण श्रेष्ठ रहेका थिए भने विशेष अतिथिको रुपमा बूनपा १२ का वडाध्यक्ष शम्भु प्रसाद भट्टराई, एन प्याव्सन काठमाडौं जिल्ला अध्यक्ष बिष्णु प्रसाद पराजुली त्रिज्योतिका मानार्थ प्राचार्य डा. भगवान अर्याल, बूनपा १२ का वडा सदस्य पुरुषोत्तम नेपाल लगायत बिभिन्न बिद्यालयका प्रिन्सिपल, शिक्षक प्रतिनिधि खेलाडी र विद्यार्थीहरुको बाक्लो उपस्थिति रहेको थियो ।
कार्यक्रमको सभाध्यक्षता त्रि ज्योति माविका अध्यक्ष तथा सेन्ट लरेन्स कलेजका अध्यक्ष केशब प्रसाद दंगालले गरेका थिए भने स्वागत मन्तव्य त्रि ज्योति माविका सहायक प्रधानाध्यापक गणेशकुमार मिश्रले राखेका थिए ।
