०४ पौष २०७५, काठमाडौं
अष्ट्रेलियाको विश्व चर्चित घरेलु क्रिकेट लिग बिग बाश लिग (बीबीएल) २०१८ आजदेखि सुरु हुने भएको छ । टि–२० स्वरुपमा खेलिने प्रतियोगिताको यो आठौं सिजन हो । करिब २ महिना चल्ने यस प्रतियोगितामा आठवटा टोलीले प्रतिस्पर्धा गर्नेछन् ।
लिग चरणमा ५६ खेल, सेमिफाइनलको २ खेल र फाइनल गरी कुल ५९ खेल खेलिने यस प्रतियोगितामा पहिलोपटक टस गर्दा सिक्का नभएर ब्याटबाट गरिने भएको छ । हिल्स र फ्ल्याटमध्ये एक छनौट गर्दै पहिले ब्याटिङ वा बलिङ छान्नुपर्नेछ । बिग बाशमा मेलबर्न स्टार्स, एडिलेड स्ट्राइकर्स, ब्रिसबेन हिट, होबर्ट हर्रीकेन्स, मेलबर्न रेनिगेड्स, पर्थ स्कोर्चर्स, सिड्नी सिक्सर र सिड्नी थन्डर गरी ८ टोली भिड्नेछन् ।
आज हुने पहिलो खेलमा ब्रिसबेन हिटले एडिलेड स्ट्राइकर्सको सामना गर्दैछ । नेपालका स्टार लेग स्पीनर सन्दीप लामिछाने मेलबर्न स्टार्सबाट बीबीएल खेल्दैछन् । सन्दीपको टोलीको खेल शुक्रबार नेपाली समय अनुसार दिउसो २ बजे सुरु हुनेछ । उनको टोलीले पहिलो खेलमा सिड्नी थन्डरको सामना गर्ने तालिका रहेको छ ।
