अशोकको ‘चौरीको चाम्रो छुर्पी’ गीत युट्युबको ट्रेन्डिङ १ मा

०४ पुष २०७५, काठमाडौँ

अशोक दर्जी अहिलेका सर्वाधिक चर्चित बाल गायक हुन् । नेपालका चर्चित गायक तथा संगीतकार टंक बुढाथोकीसँग मन बिनाको धन ठूलो की धन बिनाको मन गीत गाएर चर्चाको शिखरमा पुगेका अशोकले निकै छोटो समयमा दर्शकको मन जित्न सफल भएका छन् । अशोक सानो उमेरमै देश विदेशको कार्यक्रममा निकै व्यस्त छन् ।

पहिलो गीत सफल भएपछि केहिदिन अघि अशोकको दोस्रो गीत पनि सार्वजनिक भएको छ । चौरीको चाम्रो छुर्पी बोलको गीतमा टंक बुढाथोकी, अशोक दर्जी र ए.आर बुढाथोकीको आवाज रहेको छ । उक्त गीतलाई दर्शकले अत्यन्तै रुचाएका छन् । त्यतिमात्र नभएर अशोकको उक्त गीत अहिले युट्युब ट्रेन्डिङको नम्बर वानमा पर्न सफल भएको छ । उक्त गीतले छोटो समयमा नै अत्याधिक भ्यूज पाउन सफल भएको छ ।

यो समाचार लेख्दासम्म यो गीतलाई ३६ लाख ३८ हजार ४ सय ६६ ले हेरिसकेका छन् । उक्त गीतलाई १ लाख ३३ हजार १ सय ३१ ले लाइक गरेका छन् भने ५ हजार ४ सय ३८ ले डिसलाइक गरेका छन् । उक्त गीतमा २० हजार २ सय ५३ ले कमेन्ट गरेका छन् । अशोकको पहिलो गीतमा धेरैले भिडियो नराम्रो भएको प्रतिक्रिया दिएका थिए भने यसपटक भिडियो निकै राम्रो बनेको दर्शकले बताएका छन् । त्यतिमात्र नभएर दर्शकले अशोकको आवाजमा पनि मिठास थपिएको बताएका छन् ।