नेपाली फुटबल टोलीको प्रशिक्षकमा स्वीडिस योहान कालिन

१६ पौष २०७५, काठमाडौं

फुटबलमा नेपाली राष्ट्रिय टिम निरन्तर असफल हुँदै आएको समयमा अखिल नेपाल फुटबल संघले नयाँ प्रशिक्षकका रुपमा स्वीडिस योहान कालिनलाई अनुबन्ध गर्ने तयारी गरेको छ । एकपटक नेपाली क्लब सम्हालेको अनुभव बटुलीसकेका कालिन नेपाली फुटबलमा उत्कृष्ट प्रशिक्षकको छाप छोड्न सफल भएका छन् ।

उनले औषत क्लबका रुपमा रहेको मछिन्द्रलाई २०७० मा उपविजेता बनाएका थिए। उसको त्यो नै माथिल्लो श्रेणीको लिगमा सबैभन्दा राम्रो नतिजा हो । त्यति बेला च्याम्पियन भएको मनाङ मर्स्याङदी क्लबसँग १ अंकले मात्र पछाडि परेको मछिन्द्रले स्वीडिस प्रशिक्षक योहान कालिनको नेतृत्वमा ऐतिहासिक उपलब्धि हात पारेको थियो ।

यिनै कालिनले अब नेपाली राष्ट्रिय फुटबल टोली सम्हाल्ने निश्चित जस्तै भएको छ । एन्फाको कार्यसमिति बैठकले कालिनलाई दुई वर्षका लागि राष्ट्रिय टिमको मुख्य प्रशिक्षक बनाउने निर्णय गरेको हो । लामो प्रक्रियापछि एन्फा र कालीनबीच सहमति भएको हो । कालिनले मार्च १, २०१९ देखि फेब्रुअरी २८, २०२१ सम्म राष्ट्रिय टिम सम्हाल्ने सहमति भएको बताईएको छ ।