१८ पौष २०७५, काठमाडौं
प्रिमियर लिगको उपाधि होडमा रहेको टोटनह्याले कार्डिफ सिटीलाई ३–० ले पराजित गर्दै लीग तालिकाको दोस्रो स्थानमा उक्लिएको छ । लिग अन्तर्गत बुधबार राति भएको खेलमा टोटनह्यामले कार्डिफ सिटीलाई ३–० गोल अन्तरले पराजित गरेको हो ।
टोटनह्यामलाई जिताउन ह्यारी केन, क्रिष्टियन एरिक्सन र सन हेङ्ग–मिनले एक एक गोल गरे । तीनै गोल पहिलो हाफमा नै भएको हो । तेस्रो मिनेटमा नै केनले गोल गर्दै टिमलाई सुरुवाति अग्रता दिलाए । १२ औँ मिनेटमा एरिक्सनले गोल गरेर अग्रता दोब्बर पारे । २६ औं मिनेटमा सनले गोल गरेपछि पहिलो ३० मिनेट भन्दा कम समयकै खेलमा ३–० को अग्रता बनायो। दोस्रो हाफमा दुवै तर्फबाट गोलका लागि प्रयास भए पनि गोल हुन सकेन र टोटनह्याम ३–० ले विजयी भयो ।
जितपछि दोस्रो स्थानमा उक्लिएको टोटनह्यामको २१ खेलबाट ४८ अंक भएको छ । एक खेल कम खेलेको म्यानचेस्टर सिटीको ४७ अंक छ र तेस्रो स्थानमा झरेको छ । शीर्ष स्थानको लिभरपुलको २० खेलबाट ५४ अंक छ अर्थात टोटनह्याम ६ अंकले पछि रहेको छ ।
त्यस्तै बुधबार राति नै भएका अन्य खेलमा एभर्टनले लेस्टर सिटीलाई १–० गोल अन्तरले हराउँदा, आर्सनलले फुलह्यामलाई ४–१ गोल अन्तरले पराजित गर्यो।
