२१ पौष २०७५, काठमाडौं
शहीद स्मारक ए डिजिभन लिग प्रतियोगितामा (आज) शनिबारदेखि अन्तिम चरणका खेल सुरु हुँदैछ । लिगको १२ औं चरणको खेल सकिँदा विजेता र उपविजेताको तय भइसकेको छ ।
लिगको उपाधि मनाङ मर्स्याङदीले जित्दा संकटा क्लबले दोस्रो स्थान हासिल गरिसकेको छ । प्रतियोगिता अन्तर्गत शनिबार हुने पहिलो खेलमा जावलाखेल युथ क्लब र च्यासल युथ क्लबबीच बिहान ११ बजे प्रतिस्पर्धा हुनेछ । आजै दिउँसो साढे २ बजे सरस्वती युथ क्लब र नेपाल पुलिस क्लबबीच खेल हुनेछ । दुवै खेल हल्चोकस्थित एपीएफ मैदानमा हुनेछ। यस्तै, आइतबार पहिलो खेल हिमालयन शेर्पा र थ्री स्टारबीच हुनेछ ।
दोस्रो खेलमा मछिन्द्र र त्रिभुवन आर्मी क्लबले प्रतिस्पर्धा गर्ने छन् । सोमबार एक खेल मात्र हुनेछ। जसमा संकटा र एपीएफ भिड्नेछन् । नयाँ तालिका अनुसार च्याम्पियन मनाङ र फ्रेन्ड्स क्लबबीचको खेल अन्तिम दिन राखिएको छ । यसअघि पुस २२ गते हुने जनाइएको थियो ।
