जब चलचित्र ‘नाई नभन्नु ल ५’ का बाल गायिका र नायिका एकसाथ भेटिए

२२ पुष २०७५, काठमाडौँ

युट्युब एउटा यस्तो विशाल क्षेत्र हो । जसले धेरै जनालाई भाइरल बनाइरहेको छ । आजभोली हामीले कहिल्यै नाम समेत नसुनेका व्यक्तिहरु युट्युब मार्फत् भाइरल भएका छन् । जसका जल्दाबल्दा उदाहरण हुन् बाल गायक अशोक दर्जी । अशोक दर्जी अहिलेका सर्वाधिक व्यस्त र चर्चित बाल गायक हुन् । त्यस्तै यो बर्षको भदौमा प्रदर्शनमा आएको सुपरहिट चलचित्र नाई नभन्नु ल ५ को सर्वाधिक चर्चित गीत बालापनको उमेर गीत गाउने बाल गायिका समिक्षा अधिकारी पनि यतिबेला युट्युबमा निकै भाइरल भएकी छिन् ।

उनले गाएको बालापनको उमेर गीतलाई दर्शकले अत्यन्तै रुचाए तर त्यो गीत गाउने को हुन् भन्ने बारे दर्शक अनविज्ञ थिए । तर जब समिक्षा युट्युब मार्फत् भाइरल भइन् । आजभोली जताततै उनकै चर्चा हुन थालेको छ । पोखरा बस्ने समिक्षा हाल अर्को गीत रेकर्डिङ गराउनका लागि काठमाडौँ आएकी छिन् । उनी काठमाडौँ आएसँगै हरेक मिडियाको नजर उनीमाथि नै परेको छ ।

समिक्षा काठमाडौँ आएपछि उनले पहिलो पटक आफ्नो गीतमा नाच्ने अर्थात् नाई नभन्नु ल ५ की बाल नायिका सेड्रिना शर्मालाई भेटेकी छिन् । दुवैजनाले एकअर्कासँग भेटेर आफूलाई निकै खुसी लागेको बताए । त्यतिमात्र नभएर उनीहरुबीच को भन्दा को राम्री भन्ने कुराको बहस पनि भयो । सेड्रिनाले आफूलाई समिक्षाको आवाज  निकै राम्रो लाग्ने बताइन्  समिक्षाले आफूलाई सेड्रिनाको अभिनय अत्यन्तै मन पर्ने बताइन् । दुवै एकअर्कासँग पहिलो भेटमा नै निकै खुलेर कुराकानी गरिरहेका थिए । दुवैले एकसाथ गीत पनि गाए । समिक्षाले आफ्नो दोस्रो गीत चर्चित गायक प्रेम परियारसँग रेकर्डिङ गराएर आफ्नो गृहजिल्ला फर्किसकेकी छिन् ।