२६ पौष २०७५, काठमाडौं
सन्दीप लामिछाने अहिलेका विश्व क्रिकेटको एक चर्चित खेलाडी हुन् । उनका यात्रा आईपीएलबाट सुरु भएर अहिले बिपीएलसम्म गएको छ ।
यसबीचमा क्यारेबियन प्रिमियर लिगदेखि अष्ट्रेलियाको बिग ब्याश लिगसम्म खेलिसकेका सन्दीपले बंगलादेश प्रिमियर लिगमा दुई खेल खेलिसके । यसै सिजन बिग ब्याश डेब्यु गरेका सन्दीप लगातार चार खेल खेल्दै बंगलादेश पुगेका हुन् । बिग ब्याश अघि सन्दीपले घरेलु मैदानमा एभरेष्ट प्रिमियर लिग इपीएलमा ललितपुर प्याट्रिओट्सका लागि दुई खेल खेले। त्यसअघि उनले युएईमा भएको टी–१० लिग समेत खेल्न भ्याए ।
यी सबै लिगमा सन्दीपले विकेट लिएका थिए । सन्दीपले विकेट लिनु अहिले सामान्य कुरा भइसकेको छ । तर उनले विकेट नलिएको बारेमा समेत चर्चा हुने गर्छ । युएईमा भएको टी–१० लिगमा केरालाबाट खेलेका सन्दीपले पछिल्लो पटक बेङ्गाल टाइगर्स विरुद्ध विकेट लिन सकेका थिएनन् । त्यसपछि लगातार ७ खेलमा विकेट लिएका सन्दीप बीपीएलमा हिजो सम्पन्न खेलमा विकेट विहिन बनेका छन् । टि–१० लिगमा सन्दिप अन्तिमको ३ वटा खेलमा विकेट विहिन भएका थिए जसपछि उनले सबै खेलमा विकेट लिएका थिए।
