३० पौष २०७५, काठमाडौं
विश्व फुटबलका स्टार लियोनल मेस्सीले एकैसाथ दुई रेकर्डहरु बनाएका छन् । स्पेनिस बार्सिलोनाका फरवार्डसमेत रहेका लिओनल मेस्सीले ला लिगामा ४००औं गोल पूरा गरेका छन् । ३१ वर्षीय अर्जेन्टिनी मेस्सी अब ला लिगाको इतिहासमा ४००औं गोल पूरा गर्ने पहिलो खेलाडी बनेका छन् ।
नेपाली समयअनुसार आइतबार बिहान भएको लिगको १९औं साताको खेलमा आफ्नो घर क्याम्प नोउमा इएबारविरुद्ध खेल्नेक्रममा मेस्सीले १ गोल गरेका थिए । उनले खेलको ५३औं मिनेटमा गरेको गोल ला लिगाको ४००औं गोल थियो ।
सन् २००५ बाट ला लिगाको सिनियर टोलीबाट खेल्न थालेका मेस्सी क्लब बार्सिलोना र ला लिगाका दुवैको सर्वाधिक गोलकर्ता हुन् । ला लिगामा करिअरको ४००औं गोल पूरा गरेसँगै मेस्सी अब युरोपमा टप–५ लिगमा सबैभन्दा पहिला ४०० गोल पूरा गर्ने पहिलो खेलाडीसमेत बनेका छन् ।
यसअघि कुनै पनि खेलाडीले युरोपका कुनै पनि लिगमा ४००औं गोलको आँकडा छुन सकेका थिएनन् ।
