०९ माघ २०७५, काठमाडौं
‘मिडिया महाकुम्भ मेला’ अर्थात ‘मिडिया कम्युनिकेसन र एडभर्टाईजिङ एक्स्पो २०१९’ काठमाडौंको भृकुटीमण्डपमा हुने भएको छ ।
एकेडमी अफ मिडिया एण्ड इभेन्ट म्यानेज्मेन्ट र राष्ट्रिय मिडिया प्रतिष्ठान तथा अनुसन्धान केन्द्र नेपालको संयुक्त आयोजनामा आउदो चैत्र २९ देखि २०७६ वैशाख १ सम्म हुने ‘मिडिया महाकुम्भ मेला’ आयोजना हुने प्रेस विज्ञप्ति मार्फत जानकारी गराईएको थियो ।
उक्त तीन दिने मेला नेपाल सरकार सूचना तथा सञ्चार मन्त्रालय, नेपाल पत्रकार महासंघ, मिडियासँग सम्बन्ध राख्ने संघसंस्थाहरु, नेपाल उद्योग वाणिज्य महासंघ, लगायत नेपालका विभिन्न व्यवसायिक संघसंस्थाहरुको सहकार्यमा हुनेभएको हो ।
‘मिडिया महाकुम्भ मेला’ आयोजक डम्बर शाहूले मिडियामार्फत् देशमा सुशासन कायम, गरिबी न्यूनीकरण गर्दै आर्थिक तथा सामाजिक रुपान्तरण गरेर दिगो विकास स्थापना गर्ने सरकारको लक्ष्यलाई मद्दत पुर्याउन मेलाले सहयोग पुर्याउने बताए ।
‘मिडिया, कम्युनिकेसन र एडभर्टाइजिङ एक्स्पो २०१९’ प्रदर्शनीमा करिब २३ देशका १ सय ५० भन्दा बढी कम्पनी र संघसंस्थाहरुले सहभागिता जनाउने अपेक्षा गरिएको छ । अहिलेसम्म ३१ वटा कम्पनीहरुले आफ्नो बुकिङ गरिसकेको आयोजक शाहूले बताएका थिए ।
