१८ माघ २०७५, काठमाडौं
प्यानल्टीको अवसरलाई सदुपयोग गर्दै लाजियो इटलीको नकआउट फुटबल प्रतियोगिता कोपा इटलियाको सेमिफाईनलमा प्रवेश गरेको छ । इन्टर मिलानलाई प्यानल्टी सुटआउटमा ४–३ गोलले हराउँदै लाजियो सेमिफाईनलमा प्रवेश गरेको हो ।
निर्धारित समयमा गोलरहित बराबरी भए पनि अतिरिक्त समयमै लाजियोले अग्रता लिएको थियो । १०८औं मिनेटमा किरो इम्मोबिलले लाजियोलाई अग्रता दिलाएका थिए । अतिरिक्तको अन्तिम मिनेटमा इकार्डीको प्यानल्टी गोलमार्फत इन्टर मिलानले खेल बराबरीमा ल्याएको थियो ।
यसपटक कोपा इटलियाको क्वार्टरफाइनलमा अप्रत्यासित नतिजाहरु देखिए । उपाधि दावेदारहरु नापोली, रोमा र युभेन्टस यसअघि नै प्रतियोगिताबाट बाहिरिइसकेका छन् ।
