२० माघ २०७५, काठमाडौं
विश्व फुटबलका स्टार क्रिस्टियानो रोनाल्डोले २ गोल गरे पनि टिम युभेन्टसले जित निकाल्न सकेन । सिरी ‘ए’ अन्तर्गत गत राति भएको खेलमा युभेन्टस आफ्नै घरेलु मैदानमा १२ औं स्थानको पार्मासँग ३–३ को बराबरीमा रोकिएको हो ।
आफ्नो घरमा रोनाल्डोले २ गोल गरे भने अर्को १ गोल ड्यानियल रुगानीले गरेका थिए । यता, पाहुना टोली पार्माका लागि जेरभिन्होले २ गोल गर्दा एन्टेनियो बारिल्लाले एक गोल गरे ।
युभेन्टसलाई खेलको ३६औं मिनेटमा रोनाल्डोले गोल गरेर अग्रता दिलाएका थिए । उनकै गोलको मदतमा युभेन्टस पहिलो हाफमा १–० ले अघि रह्यो ।
अब यो बराबरीसँग युभेन्टस लिगमा अझै पनि अपराजित रहेको छ । उसले २२ खेलबाट ६० अंक बनाउँदै शीर्ष स्थान ओगटेको छ । अब युभेन्टस दोस्रो स्थानको नापोलीभन्दा ९ अंकले अघि रहेको छ । यता, पार्मा २९ अंकसहित लिगको १२औं स्थानमा रहेको छ ।
