२४ माघ २०७५, काठमाडौं
साबिक विजेता टोली बार्सिलोना कोपा डेल रे फुटबलमा आफ्नो खास प्रतिस्पर्धी रियल मड्रिडसँग बराबरीमा रोकिएको छ । नेपाली समयअनुसार बिहीबार बिहान भएको सेमिफाइनलको पहिलो लेगको खेलमा बार्सिलोना आफ्नै घरेलु मैदानमा १–१ को बराबरीमा रोकिएको हो ।
आफ्ना नियमित कप्तान तथा प्रमुख खेलाडी लिओनल मेस्सीलाई बेन्चमा राखेर घरेलु मैदान उत्रेको बार्सिलोनाले खेलमा ०–१ ले पछि परेको स्थितिमा दोस्रो हाफमा गोल गरेर खेलमा फर्किएको थियो । उसका लागि बराबरी गोल माल्कोमले गरेका थिए ।
निकै प्रतिस्र्धात्मक खेलमा अग्रता भने पाहुना टोली रियलले लिएको थियो । उसका लागि खेलको छैटौं मिनेटमै लुकास भासक्वेजले गोल गरेका थिए ।
