२८ माघ २०७५, काठमाडौं
लिगको २३ औं साताको खेलमा लिग लिडर बार्सिलोनालाई रोक्दै बिल्बाओ बलियो सावित भएको छ । नेपाली समयअनुसार सोमबार बिहान सम्पन्न खेलमा बार्सिलोनालाई लिगको १४औं स्थानको एथ्लेटिक बिल्बाओले गोलरहित बराबरीमा रोकेको हो ।
महत्त्वपूर्ण खेलमा घरेलु टोली बिल्बाओले उत्कृष्ट रक्षात्मक खेल पस्किएपछि उसले लिग लिडर बार्सिलोनालाई गोलरहित बराबरीमा रोक्दै १ अंक लिन सफल भयो ।
आजको खेलमा बार्सिलोना कप्तान लिओनल मेस्सी, लुइस स्वारेज, फिलिपे कोउटिन्होलगायत पहिलो सेटका खेलाडीसहित मैदान उत्रे पनि गोल गर्न नसक्दा उसले महत्त्वपूर्ण अंक गुमायो ।
निकै प्रतिस्पर्धात्मक खेलको पहिलो हाफमा घरेलु टोली बिल्बाओले तुलनात्मक रूपमा बढी राम्रा गोलका अवसर बनाएको थियो । तर, बार्सिलोनाका जर्मन गोलरक्षक मार्क आन्द्रे टर स्टेगेनले उत्कृष्ट बचाउ गर्दै बार्सिलोनालाई गोल खानबाट बचाएका थिए ।
दोस्रो हाफमा दुवै टोलीले गोलका अवसर बुनेका थिए । तर, त्यसमा दुवै टोलीका गोलरक्षकले एकअर्काका आक्रमण विफल पारिदिए । निर्धारित ९० मिनेट र थप समयमा समेत गोल हुन नसकेपछि खेल ०–० मा टुंगियो ।
