‘यात्रा’ को पहिलो गीतमा सलिनमानको देखियो यस्तो मस्ती (भिडियो)

०१ फागुन २०७५, काठमाडौँ

सलिनमान बनियाँ चलचित्र ए मेरो हजुर २ बाट नेपाली चलचित्र क्षेत्रमा भित्रिएको नाम हो । तर पहिलो चलचित्रबाट नै उनले नसोचेका सफलता हासिल गरे । अहिले उनको गेटअप र हेयरस्टाइलको तारिफ नगर्ने मान्छे कमै छन् होला ।

अहिले नेपाली चलचित्र क्षेत्रमा नयाँ कलाकारको आगमन बढ्दो छ । तर त्यसमध्ये कमै कलाकारले मात्र दर्शकको मनमा आफ्नो ठाउँ बनाउन सफल भएका छन् । जसमध्ये एक सलिनमान पनि हुन् । पहिलो चलचित्र सफल भएपछि अहिले उनी आफ्नो दोस्रो चलचित्र यात्रा मा व्यस्त छन् ।

चलचित्र यात्रा चैत्र २९ गतेबाट देशव्यापी रुपमा प्रदर्शनमा आउँदै छ । यसका लागि सलिनमान र दर्शक पनि निकै आतुर छन् । तर चैत्र २९ सलिनमानका लागि डबल च्यालेन्ज भएको छ । किनकी सोही मितिमा अर्का सुपरहिट अभिनेता अनमोल केसी स्टारर चलचित्र ए मेरो हजुर ३ पनि रिलिज हुँदैछ ।

केहिसमय अघि यात्रा को टिजर सार्वजनिक गरिएको थियो । जसलाई दर्शकले निकै रुचाए पनि । टिजरपछि भर्खरै मात्र चलचित्रको पहिलो गीत पनि सार्वजनिक गरिएको छ । प्रतिक पौडेलको शब्द र संगीत रहेको पन्च पन्छी बोलको गीतमा मेलिना राई, धमेन्द्र सेवाङ, प्रेक्षा बज्रचार्य र उपकार पाण्डेको आवाज रहेको छ । उक्त गीतमा सलिनमानलाई आफ्ना साथीहरुसँग खुलेर मस्ती गरिरहेको देख्न सकिन्छ ।