डीपीएल क्रिकेट प्रतियोगितामा आज दुई खेल

०२ फागुन २०७५, काठमाडौँ

तेस्रो संस्करणको धनगढी प्रिमियर लिग (डीपीएल) क्रिकेट प्रतियोगितामा आज दुई खेल हुँदैछन् ।

फाप्ला अन्तर्रा्ष्ट्रिय क्रिकेट मैदानमा आज महेन्द्रनगर गुनाइटेडले विराटनगर किंग्ससँग प्रतिस्पर्धा गर्दैछ ।
दिउँसो एक बजे हुने खेलमा महेन्द्रनगरलाई जित अनिवार्य रहेको छ ।

यसअघिको दुई खेलमा पराजित भएको महेन्द्रनगर लिगको पाँचौं स्थानमा छ ।

यसअघि भएको खेलमा महेन्द्रनगरले आफ्नो पहिलो खेलमा रुपन्देही च्यालेन्जर्ससँग दुई रनले पराजित भएको थियो भने दोस्रो खेलमा काठमाडौं गोल्डेन्ससँग सात रनले पराजित भएको थियो ।

यता, विराटनगर आफ्नो पहिलो खेलमा रुपन्देही च्यालेन्जर्ससँग पाँच विकेटले पराजित भएको थियो ।
दोस्रो खेलमा भने विराटनगरले धनगढी स्टार्सलाई २१ रनले पराजित गरेको थियो ।

आजै हुने पहिलो खेलमा भने दुई खेलमा शतप्रतिशत जित हात पारेको रुपन्देही च्यालेन्जर्स र सीवाईसी अतरियाबीच प्रतिस्पर्धा हुँदैछ ।

खेल बिहान ९ बजे सुरु हुँदैछ । दुवैै टिम जितको खोजिमा हुनेछन् ।