०५ फाल्गुन २०७५, काठमाडौं
धनगढी प्रिमियर लिग (डिपीएल)मा काठमाडौँ गोल्डेन्सले अपराजित यात्रा कायम राख्दा रुपन्देही च्यालेन्जर्सले लज्जासपद हार बेहोरेको छ ।
आइतवार भएको दोस्रो खेलमा काठमाडौँले रुपन्देहीलाई १०० रनले पराजित गरेको हो । तेस्रो जितपछि चार खेलबाट ७ अंक जोडेको काठमाडौँले शीर्ष दुईमा रहँदै क्वालिफायर्समा स्थान सुरक्षित गरेको छ ।
अब लिग चरणमा काठमाडौँले एक खेल खेल्न बाँकी छ । सुरुको दुई खेल जितेर उत्कृष्ट सुरुवात गरेको रुपन्देशी पछिल्लो दुई खेलमा हारपछि रुपन्देहीको ४ खेलबाट ४ अंक छ । काठमाडौले सिवाइसी अत्तरिया र रुपन्देहीले धनगढी स्टार्ससँग लिगमा खेल्न बाँकी छ । चार खेलबाट १ अंक मात्र रहेको साविक विजेता धनगढी लिग चरणबाटै बाहिरिसकेको छ ।
अब सिवाइसी अत्तरिया, रुपन्देही, महेन्द्रनगर युनाइटेड र विराटनगर किंग्समध्ये तीन टिम प्लेअफ पुग्नेछ भने एक टिम बाहिरिनेछ । महेन्द्रनगरले ५ वटै खेल खेलिसकेको छ र ४ अंक छ ।
यदी रुपन्देही र विराटनगर आफ्नो अन्तिम लिग खेल जितेमा महेन्द्रनगर बाहिनेछ । अन्य खेलको नतिजा आफूअनुकल आएमा भने महेन्द्रनगर प्लेअफमा पुग्नेछ ।
