डिपीएल अपडेट : रुपन्देहीद्वारा धनगढीलाई १०७ रनको लक्ष्य प्रस्तुत

०६ फाल्गुन २०७५, काठमाडौं

धनगढी प्रिमियर लिगअन्तर्गतको सोमबार (आज)को खेलमा रुपन्देहीले धनगढीलाई १०७ रनको लक्ष्य प्रस्तुत गरेको छ ।

विहान मौसम प्रतिकूलताका कारण खेल ढिलो सुरु भएको थियो । त्यसकारण खेललाई १५ ओभरमा छा्ट्याईएको थियो । टस जितेर पहिले ब्याटिङ थालेको रुपन्देहीले ९ विकेट गुमाएर १ सय ६ रन जोड्यो ।

उसका सुमित महर्जनले ३३ रन जोडे । २४ बलको सामना गरेका उनले २ चौका र २ छक्का प्रहार गरे । यस्तै विनोद भण्डारीले २४ तथा बाबर हायातले १९ रन जोडे ।

तेस्रो विकेटका लागि विनोद भण्डारी र सुमितले ५७ रनको साझेदारी गर्दै टोलीको स्कोर बढाएका थिए। त्यसअघि पहिलो ओभरमा नै रुपन्देहीले ओपनर प्रदीप ऐरीलाई शुन्य रनमा नै गुमाएको थियो ।

तेस्रो ओभरमा बाबर हायातलाई सोमपाल कामीले आमिर हायातको हातबाट क्याच गराएपछि विनोद र सुमितको जोडीले टोलीको स्कोर अघि बढाएको थियो ।

धनगढीका सोमपाल कामी, विपिन खत्री र पवन सर्राफले समान २/२ विकेट लिए ।