०६ फाल्गुन २०७५, काठमाडौं
धनगढी प्रिमियर लिगअन्तर्गत आज भएको खेलमा रुपन्देही च्यालेन्जर्सले धनगढीलाई हराएको छ । यो सँगैं रुपन्देहीले प्ले अफमा प्रवेश गरेको छ । १५ ओभरको खेलमा १०७ रनको लक्ष्य लिएर आएको धनगढी १४ ओभरमा ६६ रनमा अलआउट भयो ।
वर्षाले खेल रद्द भएपछि शनिबार धनगढीले महेन्द्रनगरसँग १/१ अंक बाँडेको थियो। रुपन्देहीले भने ३ खेलमा जित र २ खेलमा हार व्यहोरेको थियो । धनगढीको तर्फबाट पवन सर्राफले सर्वा्धिक १५ रन बनाए ।
त्यस्तै कप्तान सोमपाल कामी ११ र सन्दीप रजाइलीले १० रन बनाउनुबाहेक अन्य खेलाडीले दोहोरो अंकको रन बटुल्न सकेनन् ।
बलिङतर्फ रुपन्देहीका ललितसिंह भण्डारीले ३ तथा बिक्रम सोबले २ विकेट लिए । बसन्त रेग्मी, पुनित मेहेरा र भीम सार्कीको नाममा १/१ विकेट रह्यो । टस जितेर ब्याटिङ गरेको रुपन्देहीको तर्फबाट सुमित महर्जनले सर्वा्धिक ३३ रन बनाए । विनोद भण्डारी, बाबर हायत र बिक्रम सोबले बाहेक अन्यले दोहोरो अंकको रन बटुल्न सकेनन् ।
