०८ फाल्गुन २०७५, काठमाडौं
च्याम्पियन्स लिगअन्तर्गत गएराती भएको खेलमा लिग लिडर बार्सिलोना लियोनसँग बराबरीमा रोकिएको छ । बार्सिलोना लियोनका गोलरक्षक एन्थोनी लोपेसको सिकार भएको थियो ।
उसले गरेका दुई दर्जन बढी उत्कृष्ट प्रहारलाई उनले क्लियर गरेका थिए । स्टार खेलाडीले भरिएको बार्सिलोनाले खेल अवधिभर लियोनलाई निरन्तर आक्रमण गर्यो । खेलको सुरुवाती समयदेखि नै अवसर पाएको बार्सिलोनाका लागि लियोनेल मेसी, लुइस सुआरेज, फिलिप कोउटिन्हो र ओस्मान डेम्बेलालले लगातार मुभ बनाएपनि कुनैपनि खेलाडी सफल भएनन् ।
सगम्र प्रतियोगितामा बार्सिलोनाको यो पछिल्ला ५ खेलमा चौंथो बराबरी हो । च्याम्पियन्स लिगको नकआउट चरणका अवे खेल बार्सिलोनाले जीत दर्ता गर्न नसकेको यो लगातार छैटौं पटक हो । लियोनले भने सातौं प्रयासमा पनि बार्सिलोनालाई पराजित गर्न असफल रह्यो ।
दोस्रो लेग बार्सिलोनाले आफ्नो घरेलु मैदानमा १३ मार्चमा खेल्ने छ ।
