१५ फाल्गुन २०७५, काठमाडौं
कोपा डेल रेको सेमिफाईनलमा आज दुई निर्णायक खेलहरु हुने भएका छन् । जहाँ स्पेनका दुई कट्टर प्रतिस्पर्धी क्लब रियल मड्रिड र बार्सिलोनाको रोमाञ्चक भिडन्त हुँदैछ ।
यी दुई टोलीबीचको खेललाई मैदानको प्रतिस्पर्धा मात्रै नभएर अस्तित्वका लागि लडाइँका हिसाबले पनि लिइने भएकाले यो खेलको चर्चा र महत्त्व बढी रहने गर्छ । त्यसमा पनि यसपटक कोपामा अन्तिम चारमै यी दुईको भेट भएको हुँदा फाइनल पुग्न एकले अर्कोलाई पन्छाउनुपर्ने भएकाले भिडन्त झन् रोमाञ्चक हुने भइहाल्यो ।
यी दुई टोली यो सिजन दुईपटक यसअघि नै भिडिसकेका छन् । जहाँ ला लिगाको सिजनको पहिलो भेटमा बार्सिलोनाले आफ्नो घरमा ५–१ ले बाजी मारेको थियो भने कोपाअन्तर्गत भएको पहिलो लेगको खेल भने १–१ को बराबरीमा टुंगिएको थियो ।
रियलले यो भने सबैखाले प्रतियोगिता गरेर खेलेका ५ खेलमा एक खेल हारेको छ । उसले ३ खेल जितेर एक खेल बराबरीमा रोकिएको छ ।
रियल र बार्सिलोनाको खेल रियलको घरेलु मैदान सान्टियागो बेर्नाबेउमा आज राति नेपाली समयअनुसार १ः४५ बजेबाट सुरु हुनेछ ।
