२२ फागुन २०७५, काठमाडौँ
हिजोमात्र चलचित्र यात्रा मा समावेश चट्ट रुमाल क्या मालुम बोलको गीत सार्वजनिक भएको छ । उक्त गीत करिब २० बर्ष पहिले नै रिलिज भैसकेको थियो । चलचित्र आफ्नो मान्छे मा समावेश उक्त गीतमा स्व.अभिनेता श्रीकृष्ण श्रेष्ठ र निरुता सिंहले कम्मर मर्काएका थिए ।
चट्ट रुमाल को रिमेक गीतमा भने नयाँ कलाकारको नृत्य देख्न सकिन्छ । त्यस्तै उक्त गीत सार्वजनिक कार्यक्रममा चर्चित नायिका स्वेता खड्का पनि पुगेकी थिइन् । गीत सार्वजनिक कार्यक्रममा स्वेता श्रीकृष्णलाई सम्झेर निकै भावुक भइन् । आजभन्दा २० बर्ष पहिले श्रीकृष्णले उक्त गीतमा नाचेको सम्झेर स्वेताको आखाँभरि आँशु भएको थियो ।
स्वेतालाई चलचित्र क्षेत्रमा ल्याउने नै श्रीकृष्ण हुन् । स्वेताले आफूलाई श्रीकृष्णले नाचेको गीतमध्ये सबैभन्दा मन पर्ने गीत नै चट्ट रुमाल क्या मालुम भएकाले यसको रिमेक गीत सुन्दा श्रीकृष्णको निकै याद आएर आफू भावुक भएको बताइन् । साथै उनले रिमेक चट्ट रुमाल क्या मालुम आफूलाई निकै राम्रो लागेको पनि बताइन् ।
