रियलको शानदार जित !

२७ फाल्गुन २०७५, काठमाडौं

युरोपियन च्याम्पियन्स लिग र कोपा डेल रे फुटबलबाट आउट भएको रियल मड्रिडले ला लिगामा फराकिलो जित हाँसिल गरेको छ ।

गएराती भएको खेलमा भाल्लाडोलिभ रियल मड्रिडको शिकार भयो । अवे मैदानमा भएको खेलमा रियलले भाल्लाडोलिभविरुद्ध ४–१ को गोल नतिजा देखाउन सक्यो ।

रियलका लागि फरवार्ड करिम बेन्जेमाले २ गोल गरे ।  भाल्लाडोलिभले खेलको २९ औंम मिनेटमा सुरुवाती अग्रता लिएपनि सो अग्रता धेरैबेर टिक्न सकेन ।

तर, गोल खाएको ५ मिनेटमै रियलका लागि राफाएल भारानले गोल गरे । सो समयमा खेलको पहिलो हाफमा १–१ सम्मान गोल थियो ।

दोस्रो हाफमा भने पाहुना टोली घरेलु टोलीमाथि हाबी भयो त्यसक्रममा ५१औं मिनेटमा रियलले पेनाल्टी पायो । भाल्लाडोलिडका खेलाडीले बक्समा रियलका ओड्रिओजोलालाई लडाएका थिए । जसमा बेन्जेमाले पेनाल्टीबाट गोल गर्दै रियललाई १–२ को लिड दिए ।

फेरि खेलको ५९औं मिनेटमा बेन्जिमाले हेडिङ्ग गोल गर्न सफल रहे । त्यसपछि खेलको ८०औं मिनेटमा रियलका मिडफिल्डर क्यासेमिरो दोहोरो पहेंलो कार्ड खाँदै मैदान छाडेपछि रियल १० खेलाडीमा सीमित भयो ।

अब यो जितपछि रियलले २७ खेलबाट ५१ अंक बनाएको छ ।