२७ फाल्गुन २०७५, काठमाडौं
प्रिमियर लिगअन्तर्गत आईतबार आर्सनलले म्यानचेष्टर युनाइटेडलाई २–० ले पराजित गर्दै शीर्ष ४ होडलाई थप रोमान्चक बनाएको छ ।
यससँगै म्यानचेष्टर युनाइटेडका कार्यवाहक प्रशिक्षक ओले गुनार सोल्स्जरले प्रिमियर लिगमा पहिलो हार बेहोरेका छन् ।
स्विस मिडफिल्डर ग्रानिट झाकाले खेलको १२ औं मिनेटमा सुरुवाती अग्रता दिलाएका थिए । उनले पेनाल्टी क्षेत्र बाहिरबाट गरेको फितलो प्रहारलाई युनाइटेडका गोलरक्षक डेविड डे हेयाले ठम्याउन नसक्दा आर्सनल अगाडी बढेको थियो ।
दोस्रो हाफमा फ्रेडले एलेक्जेन्डर लाकाजेटलाई पेनाल्टी क्षेत्रभित्र लडाएपछि प्राप्त पेनाल्टीमा पिएर एमेरिक औबामेयाङले गोल गर्दै जित पक्का गरे ।
यस नतिजाले शीर्ष ४ को प्रतिस्पर्धा भने थप रोमान्चक बनाएको छ । तेस्रो स्थानको टोटेनहम हट्स्परले ३० खेलमा ६१ अंक जोडेको छ । चौथो स्थानको आर्सनलले ६०, म्यानचेष्टर युनाइटेडले ५८ तथा चेल्सीले २९ खेलमा ५७ अंक जोडेको छ ।
